NEY WA MITEGO AWATETEA POLISI, AWATAKA RAIA KUFANYA HAYA.

MKALI wa Hip hop nchini mwenye staili ya makavu live, Emanuel Elibariki ‘Ney wa mitego’ amesema kuwa hawezi kulaumu Jeshi la Polisi kwa kitendo cha kumkamata na kumlaza Lumande, kwasababu anatambuwa kuwa Jeshi hilo lilikuwa linatekeleza majukumu yake.

Akizungumza na Waandishi wa habari Mjini Dodoma mara baada ya kuitika wito na kumaliza mazungumzo rasmi na Waziri wa Habari, Utamaduni, Sanaa na Michezo Dakta Harrison Mwakyembe, Ney amewataka Raia wote wa Tanzania kuheshimu majukumu yanayo tekelezwa na Jeshi hilo.

“Najuwa wengi watakuwa wanajiuliza kwanini Ney amekamatwa wakati ni mtu maarufu ambaye angeambiwa afike kituo cha polisi angefika mara moja, hivyo raia tusilitumie vibaya Jeshi la Polisi kwa kuwachukia pindi wanapo tekeleza  majukumu yao.” Alisema Ney.

Ney alikamatwa na Polisi mara baada ya kusambaa kwa wimbo wake wa ‘WAPO’ katika mitandao ya kijamii ambao unasheheni mistari tata inayo kashifu Serikali ya Rais Magufuli, na aliachiwa kwa ruhusa ya Rais na aliitwa na Waziri mwenye dhamana ya sanaa kwa ajili ya mazungumzo juu ya wimbo huo.

Kwa upande wake Dakta Mwakyembe amesema wameelewana na msanii huyo na anasubiri nakala ya Remix ya wimbo huo ambapo anaamini itakuwa nzuri zaidi na akiipata atamfikishia Mh.Rais kwa kuwa nay eye ametokea kuupenda wimbo huo.